Frístundaávísun

Frístundaávísun

Mosfellsbær styrkir frístundaiðkun allra barna og unglinga á aldrinum 6-18 ára með lögheimili í Mosfellsbæ með framlagi að upphæð 15.000,- kr. Markmið þessarar niðurgreiðslu er að hvetja börn og unglinga til að finna sér frístund sem hentar hverjum og einum.

Styrkurinn verður afhentur í gegnum íbúagátt Mosfellsbæjar og geta foreldrar og forráðamenn því með rafrænum hætti greitt fyrir frístundaiðkun barna sinna.

Ávinningurinn við að afhenda frístundaávísunina í gegnum íbúagáttina er margþættur. Ekki þarf lengur að afhenda pappír því hægt er að senda ávísun beint með tölvupósti, engin hætta er á því að ávísun týnist og vinna frístundafélaganna verður einfaldari en áður. Einnig er með þessari leið hægt að gefa kost á því að skipta styrknum niður á tvö félög.

Ef félag sem barn vill sækja námskeið hjá finnst ekki á listanum í íbúagáttinni þá hafið samband við Þjónustuver Mosfellsbæjar í síma 525-6700 með upplýsingar um félagið. Þjónustuverið leitar þá staðfestingar íþróttafulltrúa á því að nota megi frístundaávísunina hjá viðkomandi félagi og bætir félaginu að því búnu inn á listann.

Frístundaávísunina má einnig nota til að greiða fyrir þátttöku í íþróttafjöri í frístundaseli.

Hvernig er frístundaávísunin notuð?

1. Skráðu þig inn í Íbúagátt Mosfellsbæjar.

2. Þar smellirðu á hnappinn "Frístundaávísun" vinstra megin á síðunni og færð upp umsóknareyðublað.

3. Veldu barn. (Barnið þarf að eiga lögheimili í Mosfellsbæ og hafa ekki þegar nýtt frístundaávísunina.)

4. Veldu frístundafélag. (Hægt er að skipta ávísuninni þannig að hún renni til tveggja félaga.)

5. Staðfestu greiðslu. (Með staðfestingu sinni á frístundaávísun í gegnum Íbúagátt Mosfellsbæjar samþykkir forráðamaður barns að Mosfellsbær greiði völdu félagi eða félögum þá styrkfjárhæð sem tilgreind var við félagið.)

6. Þegar umsóknarferlinu er lokið birtist mynd af ávísun sem annað hvort er hægt að prenta út eða senda beint með tölvupósti á viðkomandi félag.