Íbúafundur um fjárhagsáætlun 2011

Óskað eftir samráði við íbúa um hagræðingartillögur

Bæjarstjóri Mosfellsbæjar hélt íbúafund um fjárhagsáætlun Mosfellsbæjar 2011 í Hlégarði þann 26. október. Alls mættu um 50 íbúar á fundinn auk pólitíkusa og starfsmanna sveitarfélagsins. Markmið fundarins að fá umræðu meðal íbúa um leiðir til hagræðingar í rekstri Mosfellsbæjar á næsta ári og hugmyndir sem nýst geta við gerð fjárhagsáætlunar ársins 2011 sem nú er í gangi.

Framundan er krefjandi verkefni sem bæjaryfirvöld óska eftir samvinnu við bæjarbúa um. Ljóst er að í því umhverfi sem við búum nú í þarf að hagræða enn frekar í rekstri sveitarfélagsins.

Lagðar voru fyrir íbúa tvær spurningar: Hvar má spara og hvar má ekki spara? Fjöldi tillaga barst og má lesa þær með því að smella á hlekkinn Niðurstöður fundarins hér til hægri. Benda má á að fjöldi þeirra tillagna sem hér eru birtar eru þegar komnar í framkvæmd, margar við hagræðingu á árunum 2009 og 2010.

Birtar verða upplýsingar um hvernig unnið hefur verið úr tillögunum þegar ákvörðun um það liggur fyrir hjá bæjarstjórn.

Fólk er áfram hvatt til að senda inn hugmyndir að hagræðingu í gegn um ábendingakerfi á vef Mosfellsbæjar. Við óskum eftir að heyra raddir íbúa um hvar þeim finnist að megi hagræða og hvar ekki.